一隻亂跑亂撞、停下來晚上會失眠的兔仔；一隻沒有夢想、生命中只有竹葉的熊貓；還有那隻永遠起不了床、卻又會無限內疚的公雞……23歲的鄭靄然（Bella），有個由她一手打理的「小農場」，住滿千奇百怪性格的布偶動物，每一隻，都由她一針一線縫製，「喺我眼中，每一隻公仔都有自己嘅生命」。 由兔仔到公雞，性格也許千瘡百孔，背後都有個小故事。網絡發達造就無限可能，理大視覺傳意系畢業的Bella正是其中之一。像無數萌女生，自小愛玩布偶公仔，又愛一針一線手作縫製，無心插柳竟成事業，「由細到大好鍾意做手作仔，年初整咗隻獅子仔，叫『愛因獅坦』，貪得意影咗張相放上facebook，竟然好多人like，有朋友邀請我參加手作市集，有人欣賞，膽粗粗一口答應」。 半年訂做逾200隻 連夜趕工一針一線做了十幾隻，由患上過度活躍症停不下來的兔仔，到總是力不從心的公雞，每隻都有自己的性格和故事，「可能同細細個已經好鍾意同公仔傾偈有關，望住佢哋，就可以想像到佢哋有乜嘢性格」。 Bella對布偶的無限想像，竟引起不少人共鳴，「好多人話自己似兔仔，停唔到好攰唔知為乜嘢；有人就覺得自己似公雞，永遠活在罪惡感之下，有人就只係單純覺得幾得意」。一個下午，十幾隻手作布偶售罄，有人查詢度身訂做；有人代入故事，同病相憐。誤打誤撞，大受歡迎，自家網絡品牌theorytheory應運而生，「你同人講一樣嘢，未必有人聽，但當你話係theory（理論），咁就唔同」。看通權威的虛妄，Bella調皮大笑。聖誕時，零租金的網絡商店定單湧至，訪問當天，Bella在工作室忙着為客人縫製應節鹿仔，由眼睛大細到鹿角長短，都有要求。「都希望獨一無二嘛」，Bella說。半年間透過面書定單做了逾200隻布偶，試過有寵物主人拿着愛犬相片到來要求「複製」，也遇過女孩為分手男友訂製企鵝公仔，紀念一段感情。「佢哋都好鍾意企鵝，又係攝影發燒友，要求我整一隻有相機嘅企鵝畀佢。」新近，小妮子更將手作布偶拍成動畫，放上互聯網，延續布偶的故事，「乜嘢形式都想試吓，nothing to lose」。條條大路，怕且都可以通羅馬，至少，青春無敵的Bella是這樣想。 記者：呂麗嬋 Ref： 八方人物：女孩fb設「農場」 手作公仔大賣ttps://hk.news.appledaily.com/local/daily/article/20141230/18985791?fbclid=IwAR0RLt6A0y1B230WaF_FD7LHWa8B2KrDn9NiHj5BszabrrHpTL33Pj5YHQE